Radio Beca

Rwyf heb ymuno eto, gan mod i ar fy ngwyliau ar Fawrth y 1af, pan lansiwyd y peth, ond mi fyddaf yn ymaelodi yn y cyfarfod nesaf o'r grŵp bach lleol sydd gyda ni yn Nyffryn Aeron, wythnos i nos fory. Rwyf wedi bod ym mhob cyfarfod lleol hys yn hyn.

Wele hwn -

RADIO BECA

- RHAGOR O GWESTIYNAU (AC ATEBION, GOBEITHIO)

Dyma rannu â phawb gwestiynau sydd wedi codi yn sgil y deg cwestiwn ac ateb ar y daflen a’r cyfarfodydd a gynhaliwyd ar draws y tair sir.

1              BETH SY’N DIGWYDD I’R £100 OS NA DDAW’R FENTER I DDIM?

Gan mai cwmni cydweithredol yw Radio Beca, penderfyniad yr aelodau (pawb sydd wedi talu’r £100 ac sydd ar gofrestr y cwmni) fydd beth i wneud â’r tâl aelodaeth a gasglwyd, pe na fyddai’r fenter yn cydio’n ddigonol yn nychymyg cymdogaethau’r Gymraeg.

2              BETH YW SAIL CYFREITHIOL RADIO BECA?

Mae Radio Beca yn gwmni cydweithredol ac wedi’i gofrestru felly gan yr FCA (Financial Conduct Authority). Y disgrifiad cyfreithiol ar y cwmni yw Cymdeithas Ddiwydiannol a Darbodus (Industrial and Provident Society). Cofrestrwyd y cwmni gan yr FCA yn Gymraeg – o bosib, y cwmni cyntaf i wneud hyn. Rhif cofrestru Radio Beca yw: 31882. Mae’r rhif hwn ar gael wrth droed y taflenni cofrestru aelodaeth.

3              BETH YW ARWYDDOCÂD Y COFRESTRU HWN?

I fod yn fenter gyfreithlon mae rhaid i gwmni cydweithredol gofrestru â’r FCA. Ystyr ‘cymdeithas ddiwydiannol a darbodus’ yw na fydd hawl gan Radio Beca rannu unrhyw elw ymysg ei haelodau. Rhaid i unrhyw gyllid ychwanegol a gynhyrchir gael ei ail-fuddsoddi er budd bwriadau’r fenter.

Pe bai Radio Beca yn dod i ben mi fyddai’n ofynnol ar yr aelodau sicrhâi bod adnoddau’r cwmni yn cael eu hail-fuddsoddi yng nghymdogaethau Cymraeg y gorllewin.

4              UNRHYW ARWYDDOCÂD ARALL?

Ochr yn ochr â’r cais am ein cofrestru gan yr FCA cyflwynodd Radio Beca gais am statws elusennol yng ngolwg gwŷr y trethi a’r tollau (HMRC).

Bu’r cais yn llwyddiannus. Golyga hyn y bydd modd i roddion at goffrau Radio Beca gael eu hadnabod yn Rhoddion Cyfamod (gan alluogi Radio Beca i ad-ennill gwerth y dreth ar bob rhodd).

5              SIWT MAE’R CRIW SYDD WEDI BOD YN SEFYDLU RADIO BECA YN GWYBOD BOD Y

SAIL CYFREITHIOL A’R CYNLLUNIAU ARIANNOL YN DDILYS?

Ers ennill y drwydded oddi wrth Ofcom, ymron i ddwy flynedd yn ôl, mae’r criw llywio wedi cydweithio yn agos â Chanolfan Cydweithredol Cymru ynghyd â’u hymgynghorwyr hwythau, Co-operatives UK. Bu’r ddau gorff yn allweddol er sicrhâi cofrestriad Radio Beca â’r FCA ynghyd ag ennill statws elusennol HMRC. Â chefnogaeth Canolfan Cydweithredol Cymru cyflogwyd cwmni Ymgynghorwyr Ariannol Landsker (Hendygwyn-ar-Dâf) i gynllunio Cynllun Busnes y Cwmni. Cyflwynwyd y cynllun hwn i’r FCA ac HMRC yn rhan o’r cais cofrestru / statws elusennol. Mae croeso i unrhyw un weld y cynllun hwn. Cysylltwch â’r swyddfa (Uned 2, Bryn Salem, Felin-fach, Dyffryn Aeron, Ceredigion, SA48 8AE – ymhol@radiobeca.co.uk / 07813 173155 / 01570 471500)

6              PWY FYDD YN PENDERFYNU BETH FYDD AR RADIO BECA?

Yn syml: Ni.  Unwaith y bydd yr aelodaeth wedi’i sefydlu y cam nesaf fydd creu trefn ddemocrataidd fydd yn galluogi pobol o blith yr aelodaeth i greu grwpiau fydd yn... creu rhaglenni... trafod syniadau am raglenni... gwahodd eraill i greu rhaglenni... trafod  blaenoriaethau, ac ati.

7              OS NA FYDD POPETH YN CAEL EI GANOLI O FEWN UN STIWDIO GANOLOG SIWT MAE

CADW TREFN / CAEL PETHE I FWCWL?

Mi fydd staff fechan (gyflogedig) yn cadw trefn – yn unol â syniadau y panelau o blith yr aelodau. Mi fydd eu gwaith yn ddeublyg: (i) gwneud yn siwr fod popeth yn rhedeg yn llyfn, a (ii) hyfforddi ac ysgogi pobol yn eu cymdogaethau i gyd-greu a chyd-gyfrannu. Mi fydd Radio Beca’n wahanol i Radio Ceredigion gynt. Mae’r byd wedi symud ymlaen. Ond, o ran y drefn hon – mi fydd Radio Beca yn mabwysiadu ei system trefnu/hyfforddi/ysgogi lwyddiannus.